Det NATO-dikterte forsvarsforliket og dei amerikanske basane er alvorlege trugsmål mot freden, tryggleiken og norsk suverenitet.
Forsvarsforliket inngått på Stortinget av alle partia frå Frp til SV og Raudt, førar til kraftig opprustning og militarisering av Noreg. Astronomiske 1635 milliardar kr over dei neste 12 åra skal nyttast på militærvesenet. Dette er ein auke på 611 milliardar kr utover kva som tidlegare var anslått, og vil utgjera ei nær dobling av forsvarsbudsjettet målt i røynleg kroneverdi. Ved tilslutning til «Forsvarsløftet – for Norges trygghet – langtidsplanen for forsvarssektoren», og den vedtekne løyvinga så ga både SV og Raudt for alvor opp rolla som utanriks- og forsvarspolitisk opposisjon. Det er no i røynda ingen parti på Stortinget som er motstandar av norsk NATO - medlemskap, og det rådar slik full konsensus om dei aller fleste sidene av utanriks – og forsvarspolitikken.
Dette er særleg alvorleg no i ei tid med skjerpa rivalisering mellom stormaktene, med krigen i Ukraina og amerikanske trugsmål mot allierte statar som Danmark og Canada. USA gjer alt for å halda på det militære, politiske og økonomiske herredømet sitt over store delar av verda. Dette gjeld ikkje berre andsynes imperialistiske rivalar som Russland eller Kina, men òg andsynes land som USA har nakketak på gjennom krigsalliansen NATO.
I røynda er USA parat til å utpresse eller hærsette NATO-land som ikkje lystrer diktat frå Washington
I røynda er USA parat til å utpresse eller hærsette NATO-land som ikkje lystrer diktat frå Washington. I Noreg og andre NATO-land svarer styresmaktene med smiger og underdanigheit i staden for å førebu folkesetnaden på at «allierte» i dag kan vera okkupantar i morgon.
Her i Norden vert dette i særleg grad synleggjort ved opprettinga av ikkje mindre enn 47 amerikanske militærbasar, 12 av desse her i Noreg, kor samtlege er underlagt amerikansk juridisk, politisk og militær kontroll, stadfesta både i sjølve avtaleteksten og i SOFA-avtala med NATO av 1951.
Det framstår difor som rimeleg paradoksalt når Bjørnar Moxnes frå Raudt uttalte at det samrøystes forsvarsforliket vil føra til «et sterkere nasjonalt forsvar med økt lokal forankring». Moxnes sitt «sterke nasjonale forsvar med økt lokal forankring» er styrt frå ein kommandosentral i Norfolk, Virginia, USA, og forpliktar Noreg til m.a. deltaking i «out of area» operasjonar overalt i verda, og elles til NATO si militærdoktrine som òg inneber førstehandsbruk av atomvåpen. I staden for auka tryggleik som alle stortingspartia påstår er resultatet av det inngåtte forsvarsforliket, så vil den kraftige opprustinga saman med Sverige og Finland si innleming i NATO føra til større militær spenning og dimed auke faren for krig i Noreg og Norden.
Den vedtekne opprustinga tener ikkje berre amerikansk, men òg norsk imperialisme. Kongsberggruppen, som produserer og leverer våpen i store mengder til Ukraina og til Israel sitt folkemord i Gaza, er det siste året den desiderte børsvinnaren på Oslo Børs med ein oppgang på 179 prosent, og med ein marknadsverdi på 225 mrd. kr. Største eigaren i Kongsberg-gruppen er den norske stat ved Nærings- og fiskeridepartementet med 50,001 prosent av aksjane, og så Folketrygdfondet nest størst med 5,8 prosent eigarandel. I tillegg til auka militært og politisk spenningsnivå vil dei omfattande militærløyvingane opplagt gå ut over andre løyvingar til velferd og utdanning, nett slik NATO sine generalsekretærar Stoltenberg og Rutte har bede medlemslanda prioriterte.
I staden for honnørorda om auka nasjonal tryggleik og forsvarsevne, så er det NATO-dikterte forsvarsforliket og dei amerikanske basane alvorlege trugsmål mot freden, tryggleiken og norsk suverenitet. Difor må Noreg snarast bryte banda til USA og NATO. Ei byrjing er å reversere forsvarsforliket og seie opp baseavtalene med USA.
Kommunistisk plattform (KPml), februar 2025
